Lorategi bat soinean

• 2025eko ekainaren 7tik irailaren 28ra
• Ordutegiak eta sarrerak
• Bisita gidatuak eta jarduerak
• Erakusketa aretoan

 

Naturaren irudikapena eta, zehazkiago, lore motiboen irudikapena izango da ziurrenik, autoirudikapenarekin batera, giza eskuak marraztutako lehen gaietako bat, eta ordutik aurrera erreferentzia etengabea izango da kultura adierazpen guztietan.

Lorategi bat soinean erakusketak Barrokoaren eta Ilustrazioaren artean ehungintzaren arloan sortu ziren lore motiboen bilakaera aztertzen du Museo del Traje-ren eta San Telmo Museoaren bildumen bitartez nagusiki. Errepresentazio horiek gizakiak mundu naturalarekin zituen harremanetan gertatzen ari ziren aldaketa sakonen isla nola bihurtzen diren aztertzen dute, baita garaiko ideia artistiko, zientifiko eta filosofiko berrien eferbeszentzia ere.

Era berean, merkataritza trukeen eta aurrerapen teknologikoen eraginak gurutzatzen dira, eta horiei esker lore irudikapenak oso azkar aldatu ziren, XVIII. mendeko eta XIX. mende hasierako gustuen bilakaeraren funtsezko lekuko bihurtuz.

Erakusketak ehun eta hogeita hamar pieza inguru biltzen ditu. Horien muina XVIII. mendeko eta XIX. mendearen zati bateko janzkera eta ehun historikoen bildumak dira, beste erakunde batzuetako dokumentu eta bibliografia funtsekin, pinturarekin, zeramikarekin eta dekorazio arteekin batera.

Ibilbidean zeharkako gai batzuk ere txertatzen dira, hala nola diseinatzaileen prestakuntza, ehungintzako hainbat teknikaren garapena, botanikan eta zientzian egindako aurrerapenak eta naturaren inguruko xviii. mendeko iruditeriak. Horiei esker, lore gaiaren ulermen poliedrikoa egin daiteke, Barrokoaren eta Ilustrazioaren artean gertatzen diren aldaketa kultural sakonen adierazpen gisa.

Erakusketaren liburuxka deskargatu