Argazkilaritza

Bilduma honetan, Gregorio González Galarza jaunak eta bere seme Carmelo Gonzálezek ateratako argazkiak bildu ditugu; 2.000 argazkitik gora dira, Donostian eta Gipuzkoako beste hainbat herritan (Hondarribia, Lasarte-Oria, Hernani edo Zarautz) ateratakoak, bereziki XX. mendearen lehen erdian.

Agerian geratzen da argazkilariek Donostia oso gustuko zutela, argazki gehienak (bildumaren % 80 baino gehiago) hiriburuan ateratakoak baitira eta argazki horien bidez, hiriaren fisonomiak izandako bilakaera azter dezakegu. Fondoan honako gai hauek dira nagusi: Kontxako badiaren panoramika ugari Igeldotik, Mirakontxatik edo Urgulletik begira, Miramar Jauregiaren perspektibak edo olatu ikusgarriak Salamanka pasealekuan.

Dena den, hiriko eguneroko bizitzako irudiak ere oso maiz agertzen dira: bainu-hartzaileak hondartzan, Txofreko zezen-plazako korridak, Inauteriak edo estropadak.