Eraikinaren historia

Komentua

Gaur egungo museoa domingotarren komentu izandako XVI. mendearen erdialdeko eraikinean dago. Carlos V.a enperadorearen Estatu-idazkari Alonso de Idiáquez jaunaren babespean eraiki zen komentua eta domingotarrek San Telmori (Done Elmuri) eskaintzea erabaki zuten, marinelen zaindariari.

Hainbat erabilera

1836an, Mendizabalen Desamortizazioaren ondorioz, ordena erlijiosoak eraikinarekin zuen lotura eten egin zen eta kuartel militar bihurtu zuten. XIX. mendearen amaieran, San Telmo eraikina oso hondatuta zegoen eta herritar askok Udalari eskatu zioten zerbait egin zezan. Hori dela-eta, 1913. urtean dorrea eta klaustroa Monumentu Nazional izendatu zituzten eta gaur egun oraindik ere Estatuarenak dira bi zati horiek. 1928an, Udalak San Telmoren gainerako zatiak erostea erabaki zuen eta Udal Museoa inauguratu zuen 1932. urtean.