Margotzeko bidaiatu. Sorolla Donostian

Erakusketaren liburuxka deskargatu

Joaquín Sorolla Donostiara dator berriro, hil zeneko mendeurrena ospatzeko ekintzen barruan. 1923ko abuztuaren 10ean hil zen Cercedillan (Madril). Valentziako margolari handiaren artelanak egin ziren lekuetan erakusteko, Museo Sorollak eta Museo Sorolla Fundazioak "Sorolla. Margotzeko bidaiatu" izeneko zenbait erakusketa programatu dituzte. Donostiako erakusketa, San Telmo Museoarekin elkarlanean antolatu dena, proiektu honetako lehena da. Erakusketaren helburua da obrak sortu ziren leku berean ikusi ahal izatea museoaren funtsekin batera.

• 2023ko ekainaren 17tik urriaren 15era
• Asteartetik igandera, 10:00-20:00
• Kapitulu gelan
• Bisita gidatuak eta jarduerak
• Museorako sarrerarekin

"Joaquín Sorolla y Bastidaren (1863-1923) heriotzaren mendeurreneko programazio ofizialaren barruan, Sorolla Museoak eta Museo Sorolla Fundazioak Margotzeko bidaiatu erakusketa proiektua aurkezten dute. Proposamen original honek argiaren maisuaren obrak era naturalean edo au plein air estiloan sortutako lekuetara eramango ditu. Udako bere kanpaina oparoei egindako omenaldi merezia, Sorolla bidaiari nekaezina izan zen eta. San Telmo Museoarekin elkarlanean, proiektuaren lehen helmuga Margotzeko bidaiatu. Sorolla Donostian da, margolariak binomio hautsezina eratu baitzuen hiriarekin, bertan aurkitu baitzuen ihes egiteko eta margotzeko leku bikaina, klima fresko batez eta mugimendu handiko bizitza sozial batez gozatzeari utzi gabe.

Hogeita hamar urte baino gehiagoan (1889tik 1921era arte), margolariak aldizka igaro zuen uda Donostian, ia beti bere familiak lagunduta, alegia, bere emazte Clotilderekin eta bere seme-alaba María, Joaquín eta Elenarekin. Bere margolanekin inork ez bezala islatu zuen Donostiako modernotasun hori, bere paleta argitsu eta biziaren bidez, eta gaur egun oraindik hiriarekin lotzen diren ideia bisualak zehaztu zituen.

Sorollari Donostia hautarazi zioten eta erakusketa egituratzen duten bi arrazoi nagusi aipa ditzakegu. Lehena piktorikoa baino ez da: Kantauriko argi aldakorra. Sorollak introspekzio ariketa laudagarria egin zuen bere paletako tonuak gama leun eta ñabartuago batera aldatzean, hori hobeto baitzetorren bat iparraldeko klima aldakorrarekin. San Telmo Museoan lehenengo aldiz bilduta, haren bisten sail ospetsuen sorta zaindu bat aurkezten da, El rompeolas, Ulia mendiarekin, eta Donostiako barrualdeko paisaiak, maisua liluratu zuten agertoki nagusiak, barne hartzen dituena. Bigarrenik, Sorollak bere kolore-ohartxoak margotzeko eta horrela bere karrera guztian kronikari sozial zoli jarduteko leku bikaina aurkitu zuen hirian. Hiribide zabaletan eta Kontxa hondartzan bai margolariaren bezero dirudunak bai haren adiskide-talde handia elkartu ziren, giro kosmopolitan. Denak zeuden liluratuta indartzen ari ziren printzipio higienistek ekarritako aire zabaleko aisialdiaren kontzeptu berriarekin.

Ohartxo hauek dira bere egonaldien lekuko leialenak ere, haiekin hiriko egunerokotasunaren une errepikaezina harrapatu baitzuen mende arteko aldian. Berez obra bukatu gisa landutakoak, balio handia daukate beren egiazkotasunagatik eta bere pinturaren mamia bera dira, errealitatea islatzeko eduki zuen baliabide zuzenena izan baitziren."

Acacia Sánchez Domínguez, erakusketaren komisarioa

Bisita gidatuak

• Uztailak 6, 20 + Abuztuak 3, 17 + Irailak 7, 21 + Urriak 5
• 18:00 (es) + 19:00 (eu)
• Bisita gidatuak doan dira, baina museorako sarrera eskuratu behar da. Bisita gidaturako erreserba egin behar da (ekainaren 17tik aurrera).

Jarduerak

Museoak erakusketarekin lotutako hainbat hitzaldi eta jarduera antolatu ditu erakusketan ikuspegi ezberdinetatik sakontzea ahalbidetuko dutenak.

• Viajar para pintar. Sorolla en San Sebastián, Acacia Sánchez Domínguez
  Hitzaldia
  Ekainak 21, 19:00
• Iñudes y otras sirvientas: del lienzo a la vida real; Lola Valverde
  Hitzaldia
  Urriak 1, 12:00
• Joaquín Sorolla. Su vida y sus obras; Montserrat Fornells Angelats
  Hitzaldia
  Urriak 4, 19:00

Ikusi hemen jardueren inguruko xehetasun gehiago

Erakusketa irisgarria

Ikusmen urritasuna dutenek areto testu egokituak deskarga ditzakete sakelekora erakusketa bisitatzeko, Begiris Elkarteari esker.

Komisarioaren hitzaldia