Ingurumena

Ingurumen politika

Museoaren ingurumen politika Ekoscan ziurtagiria lortzerako garaian sinatu zenetik abiatuta EMASen eskakizunak betetzeko egokitu da.

San Telmo Museoaren helburu nagusia gizartearen iragan kultural eta historia ezagutzera ematea da Museoaren funts gehienak euskal gizartearekin lotutakoak direlarik. Horrez gain, jakintza zabaltzeko eta pentsamendua sortzeko espazioa da.

Gizartearen eraldaketan Museoak rol aktiboa jokatzen duela eta ingurumenarekiko jokaera eta errespetuzko jardunbide eredugarriak geureganatu behar ditugula uste dugu.

Horregatik, San Telmo Museoan ingurumena babesteko, poluzioa saihesteko eta erakundearen eguneroko kudeaketan ingurumena txertatzeko konpromisoa hartu dugu; hortaz, ingurumenarekiko jokaera hobetuko dugu egunez egun.

Gure ingurumen-alderdi nagusiak eta hauekin lotutako Garapen Jasangarrirako Helburuak identifikatu eta ebaluatzeko konpromisoa hartu dugu, baita gure jardunarekin eta funtzioekin lotutako alderdietan langileak trebatzekoa eta sentsibilizatzekoa ere. Hartara, lanpostuetako jokabideak gure konpromisoa islatu dezan.

Ingurumena etengabe hobetzea da, ingurumen-legeria eta bestelako betekizunak betetzeaz gain, gure erronketako bat, eta, horretarako, urtero alderdi nagusiak murrizteko ingurumen-helburuak,-xedeak eta –programak zehaztu eta berrikusiko ditugu.

Jaime Otamendi, Donostia Kulturako zuzendaria

San Telmo Museoaren ingurumen adierazpena

Suspertze, Eraldatze eta Erresilientzia Planaren turismo-establezimenduetarako inbertsioetarako eta sektore horri lotutako beste jarduera ekonomiko batzuetarako ekipamendua berritzeko laguntza-programa – Europar Batasunak finantzatua – NextGenerationEU

Museoaren instalazio museografikoa egin zenean (2010), argiztapenari aplika zekiokeen LED teknologiak ez zituen egungo prestazioak, batez ere, koloreen itzulketa fidagarriari dagokionez. Horretaz jabetuta, erantzun kromatikoa garrantzitsua ez zen eremuetan erabili zen. Elizako Serten mihiseak edo arte ederretako bilduma argiztatzeko, iturri halogenoak dituen teknologia tradizionala erabili zen.

Gaur egun, IRC 97-dun LEDa edukitzea posible da, eta horrek, krisi klimatikoaren esparruan energia-kontsumoak murrizteko premia larriarekin batera, egungo argiztapen-sistemak ordeztea iradokitzen du.

Jasotako laguntzarekin (53.068,23 €) museoko elizako eta arte historikoko aretoko argiak ordeztu dira, eta horrek ekarri du museoaren eremu horietako argiztapenean kontsumitutako energia elektrikoa % 75 inguru murriztu dela, ia 37.000 kw/urteko.