Egileak hiriari eman zion obra, eta Udalak obra jasotzeko eta ingurua urbanizatzeko gastuak ordaindu zituen. "Irailean, Chillidak "Haizearen orrazia" izeneko eskulturaren instalazioa eta azken xehetasunak amaitu zituen, eta obra Donostiako hiriari eman zion dohaintzan. Obraren kokalekua hiriko ederrenetako bat da: Tenis Puntako harkaitzak. Aurretik, harrizko zabalgune handi bat dago, Peña Ganchegui arkitektoak eraikia eta 'biltzeko tokia eta topalekua, herritarren elkarbizitzarako gunea' izateko diseinatua. Obra altzairu lehorrean egindako antzeko hiru piezaz osatuta dago, eta pieza bakoitzak 10 tonatik gorako pisua dauka. Piezak harkaitz banatan kokatuta daude, eta espazio triangeluar bat osatzen dute. Urte askotako lana laburbiltzen duen eskultura monumentala da..". ÁLVAREZ MARTÍNEZ, Mª S.: Escultores contemporáneos de Guipúzcoa, 1930-1980: medio siglo de una escuela vasca de escultura. Donostia, Gipuzkoako Aurrezki Kutxa Probintziala, 1983, 298. or. "'Haizearen orrazia' obraren inguruko ikerketak zazpi dira, 1974tik 1978ra bitarte eginak. Guztiek antzekotasun handiak dituzte zenbait estelarekin". "Zirriborro horietatik, Chillidak 1976ko 'Haizearen orrazirako ikerketa V' aukeratu zuen, monumentu-eskalan eta bertsio hirukoitzarekin Donostiako Teniseko pasealekuan kokatzeko asmoz. Obra horretan, ez zuen oinarririk erabili, eta pieza hirukoitza zuzenean harkaitzetan jarri zuen, iruditutako triangelu irregular baten erpinak markatuta. Pieza bakoitza sekzio karratua duten altzairuzko lau barra lodiz dago osatuta, eta harkaitzean finkatutako enbor batetik ateratzen dira barra guztiak. Barra horietako batek kurba bat egiten du hasieran, eta harkaitzera itzultzen da, enbor komunarekiko ibilbide paraleloan. Gainerako hirurak kakoen moduan okertuta daude, eta espazioa harrapatzen dute barnealdean. Piezak altzairuz, betetzen duten espazioaz zein barnealdeko espazioaz osatuta daude, inguruko espazio irekian ere parte hartzen dute, eta gizakia hartzeko eta naturarekiko lotura estutzeko moduko giroa sortzen dute bertan. Horretan, gainera, Peña Ganchegi arkitektoak eskulturaren osagarri gisa diseinatutako plazak neurri handian laguntzen du". "... Chillidak altzairu berezi bat erabili zuen pieza horretan. Altzairu hori herdoildu egiten da gainazalean, baina aldagaitz jarraitzen du uraren eta gatzaren aurrean, oxido-geruza bera baita narriadura-prozesua eragozten duen agente babeslea". ÁLVAREZ MARTÍNEZ, Mª S.: Escultores contemporáneos de Guipúzcoa, 1930-1980: medio siglo de una escuela vasca de escultura. Donostia, Gipuzkoako Aurrezki Kutxa Probintziala, 1983, 369. or. 2002ko irailaren 25eko Udal Osoko Bilkuran, pasealekuaren izena aldatzea erabaki zen, Eduardo Chillida urte hartako abuztuan hil zela-eta. Harrez geroztik, Eduardo Chillida pasealekua da.